Llinguastur Conseyería d'Educación Principáu d'Asturies @P_Meyor_Cantar

La banda de Luis Núñez y los Folganzanes llevó'l X Premiu al Meyor Cantar

“La ñeve y la esmeralda”, de Luis Núñez y los Folganzanes, foi’l cantar ganador de la décima edición del Premiu al Meyor Cantar. El fallu fízose públicu demientres una Gala que se celebró’l pasáu vienres 29 de setiembre del 2017 nel Teatru Palacio Valdés d’Avilés.

Luis Núñez ye ún de los nomes más veteranos na escena musical asturiana, con una actividá qu’arranca nos años ochenta del sieglu venti cola fundación del conxuntu Fuera de Serie. D’entós p’acá, Núñez nun aparó de componer y tocar, cuándo en solitario, cuándo acompañáu de músicos de primer nivel, como los que s’axuntaron nel añu 2013 pa grabar El cantar del folganzan, el primer discu del grupu Luis Núñez y los Folganzanes.

Nel añu 2016 grábase’l segundu discu de la formación, col títulu Xuro nun tornar. Caracterizáu por una sonoridá folk-rock mui marcada, esti trabayu axunta diez canciones que combinen madurez y frescura, tal como asocede en "La ñeve y la esmeralda", cola que ganó’l X Premiu al Meyor Cantar.